Ficha completa
| Título | Neofablants, a muda lingüistica en o contexto rural de baixa vitalidat de l’aragonés. Artieda en a comarca d’a Chacetania, estudio de caso. |
|---|---|
| Autoría | Anchel Reyes (Seminario Aragonés de Sociolingüistica) Natxo Sorolla |
| Resumo | En o contexto de minorización demolingüistica de l’aragonés, no existe guaire tradición d’estudios sociolingüísticos. A partir de 2014 con a creación d’o Seminario Aragonés de Sociolingüistica dentro de l’Asociación Aragonesa de Sociolochía s’empentan diferents estudios dende l’anvista sociolingüistica en que participan miembros d’o seminario (Gimeno y Sorolla, 2014; Reyes, Espluga y Gimeno, 2015; Sorolla, 2016; Reyes et al. 2017; Sorolla et al. 2017; Reyes y Sorolla, 2017). A explotación sociolingüística d’os datos d’o Censo de Población y Viviendas de 2011 (Reyes et al. 2017) inauguran o estudio d’os neofablants en a sociolingüística de l’aragonés, porque desvelan que existen 7.183 parlants d’aragonés en a ciudat de Zaragoza, castellanizada de tot a nivel familiar. Amas amas, se detecta que nomás bi heba 790 personas naixidas d’a zona d’alta vitalidat de l’aragonés vivindo en a ciudat de Zaragoza, lo que indica que o numero de personas que declaran saber charrar aragonés en a capital que lo han aprendiu por transmisión familiar ye mas chicot que no lo numero de neofablants d’aragonés. O fenomeno se repite por tot Aragón tanto en a zona de baixa vitalidat de l’aragonés como en a zona castellanofablant. En o caso d’a comarca d’a Chacetania o numero de parladors d’aragonés en a zona de baixa vitalidat d’ista comarca ye de 637 personas, mientres que os naixius d’a Zona d’alta vitalidat en 2011 yeran 370. En Reyes et al. (2017) s’enuncia que nomas o 19% d’as personas d’a zona d’alta vitalidat de l’aragonés ye capable de charrar-lo, por lo qual sabemos que d’ixas 370 personas no todas sabrán charrar aragonés. En os grupos de discusión feitos en un estudio sociolingüistico cheneral d’a Chacetania (Reyes y Sorolla, 2017) s’enuncia que los neofablants no troban espacios pa fer servir l’aragonés debiu a la gran minorización demolingüistica. O contexto d’Artieda ye d’un puesto d’a zona de baixa vitalidat d’a comarca con millors actitutz lingüisticas enta l’aragonés, debiu a la fuerte tradición aragonesista d’o lugar. Antimas, Artieda ye un lugar chicorron con una fuerte concencia comunitaria con 73 habitants empadronaus l’uno de chinero de 2018, en que, anque exista un cierto conoiximiento d’aragonés entre una minoría considerable d’a población, l’uso contino se reduce a las relacions entre quatro personas que i vivimos. Pa fer chirar a situación o concello fa un taller d’aragonés en que se convinan 12 sesions alternas de gramatica y de practica. En as sesions de practica se mira de normalizar l’uso y se convida a diferents profesionals d’a redolada a fer tallers de toda mena (Cocina, cuentacuentos, instalación de software, flora y fauna etc.). En o panel se convinarán datos y reflexions quitaus d’os zagueros informes, con un estudio de caso con o metodo de retz socials en a Tabierna d’Artieda, quantificando lo impacto d’o taller d’aragonés en l’uso cutiano d’a luenga autoctona en as interaccions en o lugar. |
| Tipo | Panel: Neohablantes de lenguas de la península ibérica |
| Horario | Venres 15 de xuño | 15:30 - 17:00 | Aula: B3 |